АҚШ-тың әскери әуе күштері Иранға соққы жасады

АҚШ президенті Дональд Трамптың хабарлауынша, америкалық әскерилер Иран аумағындағы үш ядролық нысанға – Фордо, Натанз және Исфаханға әуе соққыларын жасады, деп жазады Orda.kz.

Оның айтуынша, операция сәтті өткен: «Бүкіл оқ-дәрі қоры негізгі нысан – Фордоға жұмсалды».

«Біз Иранның үш ядролық нысанына өте сәтті соққы жасадық. Құрметті америкалық жауынгерлерімізді құттықтаймын. Әлемде мұндайға қауқарлы басқа армия жоқ» деп жазды Трамп Truth Social әлеуметтік желісінде. 

Сондай-ақ ол АҚШ ұшақтарының Иранның әуе кеңістігінен шығып, базаларға оралғанын «Қазір бейбітшілік уақыты келді», – деп атап өтті.

Трамп Вашингтон уақыты бойынша 22:00-де Ақ үйден халыққа үндеу жасайтынын мәлімдеді. Ол Иранның ядролық нысандарына жасалған соққыларды «АҚШ, Израиль және бүкіл әлем үшін тарихи сәт» деп атады. Трамптың айтуынша, енді Иран соғысты тоқтатуға келісуі тиіс.

Axios порталы Израиль шенеунігіне сілтеме жасап, Трамп әкімшілігі бұл соққы туралы алдын ала Израильді хабардар еткенін жазды.