2025 жылы қазақстандық әуе компанияларында 145 жеке ұшақ болады

Қазақстандық әуе компаниялары 2025 жылға қарай 145 ұшаққа ие болады. Бұл туралы Қостанай облысына жұмыс сапарымен келген ҚР Көлік министрі Марат Қарабаев халықпен кездесуінде айтты.

Ведомствоның баспасөз қызметі хабарлағандай, облыс тұрғындарымен кездесу «Жастар сарайы» орталығында өтті. Оған 70-ке жуық жергілікті кәсіпкерлер, белсенділер мен өндірістік кәсіпорындар және БАҚ өкілдері қатысты. Тұрғындар облыстың көлік инфрақұрылымының тозығы жеткеніне қатысты сұрақтар қойды.

Елді мекендер ішінде және қалалар арасында автобус қатынасы нашар, жолдар нашар, теміржол көлігінде қызмет көрсету деңгейі төмен. Тұрғындар облыс орталығындағы әуежайды қайта құрудың орындылығы туралы да мәселені көтерді.

«Ұшақтың қолжетімділігі қоғамда жиі талқыланатын мәселе. Билеттер қымбат - біз мойындаймыз. Қазір жаңа арзан авиакомпания мен халықаралық компанияның қазақстандық нарыққа шығу мәселесін пысықтап жатырмыз. Егер бәсекелестік пайда болса, билет құны төмендейді. Сонымен қатар, азаматтардың әл-ауқаты да ұдайы өсіп келеді. Бұл әуе тасымалына деген сұраныстың жыл сайын 27%-ға өсуінен көрінеді. Оны қанағаттандыру үшін біз жаңа ұшақтарды белсенді түрде сатып ала бастадық. Биыл біз Тағы 11 ұшақ сатып аламыз, содан кейін Қазақстанда 100 ұшақ болады. Ал 2025 жылға қарай отандық жолаушылар әуе компанияларында 145 жеке ұшақ болады деген ойдамыз. Сонымен қатар жаңа әуе бағыттарын ашуды жоспарлап отырмыз», - деді Марат Қарабаев