«180 млн теңге иемденген»: Қаржылық пирамида ұйымдастырушысы сотталды

«Chia TaiPharmaceutical» қаржылық пирамидасын ұйымдастырушының кінәсі анықталды, деп хабарлайды Orda.kz. 

2022 жылдың қыркүйегінен 2023 жылдың сәуір айына дейін Батыс Қазақстан облысы Шыңғырлау ауданының тұрғыны «Chia Tai Pharmaceutical» қаржы пирамидасына қосылып, оның құрылымдық бөлімшесінде жетекші болған. 

Ол фармацевтикалық зауытқа заңды инвестиция саламыз деген жалған уәдемен салымшыларға жоғары кіріс алуға уәде беріп, заңсыз қаражат иемденген.

Нәтижесінде 185 жәбірленушіге жалпы сомасы 180 миллион теңгеден астам материалдық шығын келтірілген.

Сотталушының қаржылық пирамиданы құру және басқару, сондай-ақ қылмыстық жолмен алынған ақша мен басқа да мүлікті заңдастыру бойынша кінәсі толық дәлелденді. 

Сот мемлекеттік айыптаушының ұстанымымен келісе отырып, пирамида ұйымдастырушысына 5 жылға бас бостандығынан айыру түріндегі жаза тағайындады.