Шымкентте қарт әжей мектепке барып, 1 сынып оқушысына қол көтерген. Енді қария ашуға бой алдырғаны үшін сотта жауап береді.
Бұл туралы Orda.kz Otyrar.kz басылымына сілтеме жасап хабарлады.
Тамызда оқушылар дайындық сабақтарын өтіп жатқанда бірінші сынып оқушылары сөзге келіп қалған. Оның бірі үйіне барып, әжесіне шағымданған. Ашулы қария сыныпқа кіріп, екінші балаға дауыс көтеріп, оның бетінен ұрған.
Оқиғаның барлығы видеоға түсіп қалған.
Мектеп директоры «әжейді тоқтатып үлгермедік» дейді.
– Баланың бетінде із қалды. Әйелдің қолында сақина болған деп ойлаймын, – деді «Жас Дарын-2» мектебінің директоры Пернебай Беделов.
Зардап шеккен оқушының ата-анасы полицияға арыз жазып, баласын басқа мектепке ауыстырып жіберді.
Полицияға арыз түскеніне 2 ай болса да, қария әлі жазаланбаған.
– Екі айлық тергеуден кейін іс сотқа кетті, – деді жергілікті полицияда.
ҚР Әкімшілік құқық бұзушылықтың 73-бабы (Ұрып-соғу) бойынша тергеу жұмыстары жүріп жатыр. Қария 30 мың теңге айыппұл төлеп не 10 күнге қамауға алынуы мүмкін.
