Ұлттық банк базалық мөлшерлемені 18%-ға көтерді

Ұлттық банк араға жарты жыл уақыт салып базалық мөлшерлемені өсірді, деп хабарлайды Orda.kz. 

ҚР Ұлттық Банкінің ақша-несие саясаты комитеті базалық мөлшерлемені жыл бойынша 18% деңгейінде белгілеу туралы шешім қабылдады. Бұған дейін базалық мөлшерлеме 16,5% болған еді. 2024 жылы ол 15,25% болған.

Ұлттық банктің мәліметінше, инфляцияның күшеюі, сұраныстың ұсыныстан асып түсуі және белсенді қазына саясаты аясында ақша-несие шарттарының жұмсаруы бағаның шектен тыс өсуіне қауіп туғызған. Осыған байланысты инфляцияның динамикасын тұрақтандырып, бағаның бақылаудан шығуына жол бермеу үшін осындай қадам жасауға тура келген. 

Базалық мөлшерлеме – бұл орталық банктің ақша құнын басқару тетігі. Ұлттық банк база мөлшерлемесін екінші деңгейдегі банктерге несие берерде және олардың ақшасын депозитке қабылдарда қолданады.

Айта кетейік, ақпан айында Ұлттық банк төрағасының бірінші орынбасары ауысты. Мемлекет басшысының өкімімен Ерұлан Кенжебекұлы Жамаубаев ҚР  Ұлттық Банкі төрағасының бірінші орынбасары болып тағайындалды.