Украин дрондары Қазақстан шекарасына жақын орналасқан мұнай өңдеу зауытына соққы жасады

 Орынбор облысында орналасқан зауытқа ұшқышсыз ұшу аппараттары шабуыл жасады, деп хабарлайды Orda.kz.       

«Украинская правда» басылымы өз дереккөзіне – Украина Қауіпсіздік қызметіндегі (СБУ) ақпарат көзіне сілтеме жасап, Орск қаласындағы «Орскнефтеоргсинтез» мұнай өңдеу зауытына шабуыл жасалғанын хабарлады. Басылым шабуыл сәті түсірілген видеоны да жариялаған.

«Зауытта эвакуация жарияланды, ал Орск қаласының билігі тұрғындарды дүрбелеңге бой алдырмауға шақырды» деп жазады украин ақпарат құралдары.

Шабуыл фактісін жанама түрде Орынбор облысының губернаторы Евгений Солнцев те растады.

«Аймақ аумағында өнеркәсіптік нысандардың біріне қарсы жау дрондарымен шабуыл жасау әрекеті тіркелді. Халық арасында зардап шеккендер жоқ. Кәсіпорынның технологиялық процестері бұзылған жоқ. Оқиға орнында шұғыл қызметтер жұмыс істеп жатыр» деп жазды ол өз Telegram-арнасында. 

«Орскнефтеоргсинтез» мұнай өңдеу зауыты Ресейдегі мұнай өңдеу саласындағы ең ірі кәсіпорындардың бірі саналады. Ол Ресей мен Украина шекарасынан шамамен 1400 шақырым қашықтықта, ал Қазақстан шекарасынан небәрі 20 шақырымдай жерде орналасқан. Бұл – қазіргі уақытта Украина шабуыл жасаған Қазақстан Республикасына ең жақын нысан.

18 наурыз күні Батыс Қазақстан облысына әскери дрон құлады. Алдымен дронды жергілікті тұрғындар тапты және оны ұшқышсыз ұшық аппараты деп ойлаған. Бірақ қазір оның ресейлік «Герань» дроны екені анықталды.