Түркістанда тілсіз жау 12 адамның, оның ішінде тоғыз баланың өмірін жалмады

Түркістан облысының Алғабас ауылында бүгін таңертең екі қабатты үйден шыққан өрттен 12 адам қаза тапты, олардың 9-ы бала, деп хабарлайды Orda.kz.

Өрт сөндірушілер жеткен кезде үй түгелдей жанып жатқан. Құтқарушылар тексеру барысында ес-түссіз жатқан үш адамды сыртқа шығарып, медицина қызметкерлеріне тапсырған. Үйдің ішінен 12 адамның денесі табылды, олардың тоғызы – балалар.

Өрт 360 шаршы метр аумақта сөндірілді. Оқиға орнында барлық жедел қызмет жұмысын жалғастырып жатыр. Тергеу басталды, өрттің себебі анықталып жатыр.

Президент Қасым-Жомарт Тоқаев Жетісай ауданындағы жеке үйде болған өртке байланысты көңіл айтты. Ол облыс әкімдігіне зардап шеккендердің туыстарына барлық қажетті көмекті ұйымдастырып, қайғылы оқиғаның мән-жайын толық тексеруді тапсырды.

Балалар құқығы жөніндегі уәкіл Динара Закиева оқиғаның егжей-тегжейін бөлісті. Оның айтуынша, «үйде екі отбасы тұрған, ата-аналар мен балалар бірге болған. Өрт кезінде шатыр қирап түскен».

Оқиға орнына өңірлік уәкіл мен психологтар тобы жіберілді.

Облыстық полиция департаменті өрт қауіпсіздігі талаптарын бұзу фактісі бойынша қылмыстық іс қозғады.