«Тренд пе, мазақ па?»: есту қабілеті нашар таксисті видеоға түсірген блогер жұрт талқысына түсті

Блогердің есту қабілеті нашар таксистің көлігінде түсірген бейнеролигі қоғамның наразылығын тудырды. Бейнежазбада баласына шулауға рұқсат беріп, өзі дауыстап ән айтып, жүргізушіні сыртынан рұқсатсыз видеоға түсіргені байқалады, деп хабарлайды Orda.kz. 

TikTok блогер Нұрила Аманбаева желіде тарап кеткен бейнероликтен кейін кешірім сұрап, видеоны әзіл ретінде, америкалық трендке еліктеп түсіргенін айтты. Алайда желі қолданушылары бұл әрекетті ешқандай тренд емес, барып тұрған мазақ деп бағалады.

«Бейнероликті түнде жариялап, бірнеше сағаттан кейін өшірдім. Себебі мұндай әрекетімнің дұрыс емес екенін түсіндім. Біреудің көңіліне тиген болсам, кешірім сұраймын. Енді мұндай қайталанбайды», – деді Аманбаева.

Сонымен қатар, Threads әлеуметтік желісінде блогердің әрекетіне қарсы жазбалар көбейіп, мыңнан астам қаралым жинаған. Тіпті адвокат Жохар Өтебеков бұл әрекеттің тренд емес, мазақ екенін айтып, таксистке заң тұрғысынан көмек көрсетуге дайын екенін жазды.