Тоқаев Назарбаев айырылған лауазымға ие болды

4 шілдеде Қасым-Жомарт Тоқаев Қазақстанның Ұлттық қорын басқару жөніндегі кеңес құру туралы жарлыққа қол қойды. Кеңес төрағасы Тоқаевтың өзі болмақ, деп хабарлайды Orda.kz. 

Президенттің тиісті жарлығы Қазақстан нормативтік құқықтық актілерінің ақпараттық-құқықтық жүйесі сайтында жарияланды.

Сондай-ақ жарлыққа сәйкес, Қазақстанның Ұлттық қорын басқару жөніндегі кеңес Қазақстан президентінің жанындағы консультативтік-кеңесші орган ретінде белгіленген.

Кеңестің негізгі міндеттеріне Қазақстан Ұлттық қорының қаражатын пайдалану және бірыңғай жинақтаушы зейнетақы қорының зейнетақы активтерін басқару мәселелері бойынша жәрдемдесу жатады. 

Кеңес Қазақстан Бюджет кодексінің 63-бабына сәйкес Қор қаражатын пайдалану мәселелерін қарайды.

Айта кетейік, 2023 жылы қарашада Қазақстан президенті Қасым-Жомарт Тоқаев Қазақстанның экс-президенті Нұрсұлтан Назарбаев басқаратын «Самұрық-Қазына» қорының басқармасын таратып жіберді.