Тоқаев бастамасы: футбол клубтары жекешелендіріліп жатыр

Қазақстан футбол федерациясының бас хатшысы Давид Лория үкімет отырысында елдегі футбол клубтарын жекешелендіру жұмыстары барысын баяндады, деп хабарлайды Orda.kz.

Қазан айының соңында «Қайсар» ресми түрде жеке меншікке өтті. Клубтың жаңа иесі — TAU Group LTD компаниясының жетекшісі Иманғали Қозбақов.

«Қызылорда әкімдігі футбол академиясының құрылысына жер телімін бөлді. Инвестиция көлемі 12 миллиард теңге», — деді Давид Лория.

Оның айтуынша, 15 қарашаға дейін «Қызылжар» мен «Жеңіс» клубтарын да инвесторларға беру жоспарланған.

«Жеңіс» клубы үшін елорда әкімдігі заманауи футбол академиясын салуға жер телімін бөлді. Клубты инвесторға беру бойынша заңдық рәсімдер осы айдың ортасына дейін аяқталуы тиіс. Академия құрылысына шамамен 16 миллиард теңге инвестиция салынбақ», — деп толықтырды ҚФФ бас хатшысы.

Қарағандылық «Шахтер» клубының жекешелендіру процесі де қараша айының соңына дейін аяқталмақ.

Клубтарды жеке қолға беру бастамасы президент Қасым-Жомарт Тоқаевтың «футбол клубтары жекешеленуі керек» деген мәлімдемесінен кейін қолға алынған.