Тоқаев бала құқықтары жөніндегі уәкіл Динара Зәкиеваны қабылдады

Президентке бір жыл ішінде балалардың құқықтарын қорғау және қауіпсіздігін қамтамасыз ету мақсатында атқарылған жұмыстар бойынша бала құқықтары жөніндегі уәкіл Динара Зәкиева есеп берді. 

Бұл туралы Aqorda хабарлады.

Қасым-Жомарт Тоқаев әйелдер мен балалар құқықтарын қорғау бағытында қабылданған заңнамалық өзгерістер нәтижесінде тұрмыстық зорлық-зомбылықтың алдын алу шаралары күшейтілгенін және балаларға қатысты зорлықтың кез келген түріне жаза қатаңдатылғанын атап өтті. Заңға Бала құқықтары жөніндегі уәкіл мен азаматтық қоғам секторы бірлесе ұсынған нормалар топтамасы енді. 

Динара Зәкиеваның баяндамасынан:

• Қазір аталған заңнамалық нормаларды нақты жүзеге асыру мақсатында белсенді жұмыс жүргізілуде:      
• Атап айтқанда, «111» бірыңғай байланыс жүйесі іске қосылды. Сондай-ақ мектептерде буллингпен күресу үшін КiVa бағдарламасы және 2024 жылдың қыркүйек айынан бастап қауіпсіздік сабақтары енгізіледі;    
•  балаларға арналған медициналық-әлеуметтік мекеме қызметкерлері үшін арнайы оқу курсы басталады;   
•  қорғаншылық және қамқоршылық органдарын күшейту мәселесі пысықталып жатыр;  
•  «Самұрық-Қазына» ұлттық әл-ауқат қорымен, сондай-ақ «Қазақстан халқына» және «Қамқорлық» қорларымен серіктестік негізде 6 аутизм орталығы, 11 өңірлік оңалту орталығы ашылды. 

Бала құқықтары жөніндегі уәкілдің есебін тыңдаған соң Президент құқықтық сауаттылық деңгейін көтеру және оқушылар арасында «Заң мен тәртіп» қағидатын насихаттау маңызды екенін айтты.

Кездесу барысында жетім және ата-анасының қамқорлығынсыз қалған балаларға тұрғын үй бөлу, сондай-ақ ауылдық жерлерде жеткіншектерге арналған инфрақұрылымды дамыту мәселелері талқыланды.