Таразда сыныптасының соққысынан 9-сынып оқушысы көз жұмды

Тараз қаласындағы мектептердің бірінде 9-сынып оқушысы сыныптасының соққысынан кейін көз жұмды, деп хабарлайды Orda.kz.

Жанжал мектептің дәретханасында болған, сөзге келіспеген балалар жұдырықтасқан. Нәтижесінде, соққы алған жасөспірім санаулы минуттарда қайтыс болған.

Оқиғаны Жамбыл облыстық полиция департаменті растады.

«Аталған факті бойынша ҚР ҚК 106-бабы 3-бөлігімен (қасақана ауыр зиян келтіру, адам өліміне әкеліп соққан) сотқа дейінгі тергеу басталды. Күдікті жасөспірім уақытша ұстау изоляторына қамалды», деп хабарлады ведомство.

Orda.kz мәліметінше, бұл істі облыс әкімі Ербол Қарашөкеев жеке бақылауына алған. Қайғылы жағдай болған мектептің әкімшілігіне қатысты шара қолданылуы мүмкін.

Еске сала кетейік, 21 жастағы Тараз тұрғыны шешесін зорлады деген күдікке ілініп, қамауға алынған.