«Соттың қателігі»: 38 жыл түрмеде отырған адамның жазықсыз екені анықталды

Кісі өлтірді деген айыппен 38 жыл түрмеде отырған британдық Питер Салливан сотты жеңіп шықты. Бұл іс Ұлыбританиядағы ең ұзаққа созылған сот қателігі болды, деп хабарлайды Orda.kz. 

Айта кетейік, 1986 жылы 21 жастағы бармен Диана Синдалл Беркхенд қаласында өлі табылды. Ол жұмыстан үйіне қайтып бара жатқан. Қызды әлдекім ұрып-соғып, зорлап, кейін өлтіріп кеткен. Бойжеткенді өлтірді деген айыппен 29 жастағы Питер Салливан ұсталды. Ол 1987 жылы түрмеге жабылды. Сотталған адам өзінің кінәсіз екенін үнемі айтып, бірнеше рет шағым түсірген. Алайда сот шешімі өзгеріссіз қалды. 

2021 жылы ер адам қайтадан апелляциялық шағым түсірді. Комиссия тағайындаған жаңа сынақтар нәтижесінде ер адамның кінәсіз екені анықталды. 13 мамырда Питер Салливанға тағайындалған үкімнің күші жойылды. Питер Салливан қазір 68 жаста. 

Уэйкфилд түрмесінен бейне тыңдауға қатысқан Питер Салливан үкімнің күші жойылғанын есітіп, жылап жіберді. 

Сот барысында 1987 жылы Салливан соты кезінде ДНҚ талдауын анықтау және салыстыру технологиясы болмағаны және жаңа сынақтарды жүргізу туралы кейінгі сұраулар қабылданбағаны атап өтілді.

Еске салайық, музыкант P. Diddу қыз зорлағаны үшін 50 жылға бас бостандығынан айырылуы мүмкін. Ол өзіне тағылған айыптардың бәрін жоққа шығарып жатыр.