СІМ Азаттықтың 12 тілшісінің аккредитациясын 3 айға созды

Қазақстанның сыртқы істер министрлігі Азаттықтың 12 тілшісінің аккредитациясын 3 айға созды, деп хабарлайды Orda.kz.

Азаттықтың мәліметінше, СІМ жаздан бері соттасып келе жатқан 16 тілшінің аккредитациясына қатысты мәселесі әлі шешілген жоқ. 

«Құқықтық медиа орталықтың» заңгері Гүлмира Біржанова Қазақстан билігінің журналистерге аккредитация бермеу кейсін елдің халықаралық қауымдастық алдындағы міндетін орындамау ретінде тануды сұраған.

«Сот қазақстандық 16 журналист шетел журналисіне теңестіріп, оларды кәсіби міндетімен айналысу құқығынан айырды. Қазір мәселе редакцияның тең жартысы туралы болып отыр. 14 қазанда осы журналистерге аккредитация беру мәселесі шешіледі. Қазір Азаттық пен Қазақстанның сыртқы істер министрлігі арасында сот жүріп жатыр. Азаттық тілшілері жұмысына орала ала ма, жоқ па, білмейміз», – деді заңгер.

Бұған дейін Азат Еуропа / Азаттықтың Қазақ қызметі өз тілшілеріне аккредитация бермеген Қазақстанның сыртқы істер министрлігінің үстінен сотқа шағым түсірген. Қазақстанның сыртқы істер министрлігі Азаттық журналистері аккредитациясы болмаса да жұмыс істеп, заң талаптарын бұзды деген. Ал Азаттық аккредитация беру туралы өтінішті уақытында берсе де, оны қарау мерзімін ведомствоның өзі негізсіз ұзартқанын айтқан.

Еске сала кетейік, «Алматыметроқұрылыс» АҚ басқармасының төрағасы, кәсіпкер Қайрат Реимов Orda.kz басылымының бас редакторы Гүлнәр Бажкеноваға берген сұхбатында Қытай мен еліміздің шекарасында  салық жинайтын топтың қалай құрылғанын баяндады. Сонымен қатар, қалтасын қампайтқан олар миллиардтаған доллардың орнын кеден есебінде қалай үңірейтіп кеткенін айтты.