Шымкенттегі балабақшада балаларды ұрған тәрбиеші қамауға алынды

Шымкенттегі «Ай көркем» жекеменшік балабақшасының тәрбиешісі балаларға қол жұмсағаны үшін қамауға алынды, деп хабарлайды Orda.kz.

Ата-аналардың бірі баласының денесінде көгерген іздерді байқап, бейнебақылау жазбасын қарауды талап еткен. Бала тәрбиешінің ұрғанын, ұзақ жылағанын айтып шағымданған. Бейнежазбадан тәрбиешінің екі сағат бойы балаларды ұрып, қолынан сүйреп, сызғышпен соққылағаны анық көрінеді. Кей сәттерде тәрбиеші оларды ұрған соң, еш алаңсыз телефонын қарап отырған.

Зәбір көрген баланың анасы оқиға туралы әлеуметтік желіде жазба жариялады.

«Балам — 2022 жылғы, үшке де толмаған. 4 маусым күні балабақшадағы тәрбиеші “балаңыз құлап, беті қызарып қалды” деп ескертті. Алайда сағат 9:30-дан бастап оны ұрып-соға бастаған. Балам екі сағат бойы тоқтамай жылаған. Жылап жатып жерде ұйықтап қалады. Сағат 15:00-ге дейін денесінің қызарғаны басылмаған соң, құлап қалды деп ақталған» деп жазды анасы.

Оқиғаға байланысты қылмыстық іс қозғалды. Тәрбиеші уақытша ұстау изоляторына қамалды.

Айта кетейік, осыған ұқсас оқиға биыл қаңтарда Атырауда тіркелген. Жекеменшік балабақша тәрбиешісі баланы тепкені үшін әкімшілік жауапкершілікке тартылған еді.