Шымкентте жастар театрының басшысы сыбайластарымен бірігіп қомақты қаражат жымқырды

«Шымкент жастар театрының» директоры мен бірқатар лауазымды тұлғалар 136 миллион теңгеден астам мемлекеттік қаржыны жымқырды деген күдікпен қамауға алынды, деп хабарлайды Orda.kz.

Қаржы мониторингі агенттігінің (ҚМА) мәліметінше, театрға концерт өткізуге қажетті жабдықтарды сатып алуға бюджеттен 320 миллион теңге бөлінген. Алайда сатып алу рәсімінде заңбұзушылықтарға жол берілген.

«Күдіктілер электрондық дүкен арқылы жалған сатып алу рәсімін жасаған. Кейін бөлінген қаржыны қолма-қол ақшаға айналдырып, өз қажеттіліктеріне жұмсаған», — деп хабарлады агенттік.

Тергеу барысында күдіктілердің бірі 48 миллион теңгеге көлік пен пәтер сатып алып, мүлікті жақындарының атына тіркегені анықталды.

Қазіргі уақытта күдіктілер уақытша ұстау изоляторына қамалды.

Еске сала кетейік, бұған дейін М.Әуезов атындағы Оңтүстік Қазақстан университетінде де ірі көлемдегі қаржы жымқыру тіркелген болатын. Тергеу нәтижесінде университет басшылығының жалған келісімшарттар арқылы 256 миллион теңге көлемінде бюджет қаражатын иемденгені белгілі болды.