ШҚО-да құны 47 млн теңге болатын 70 бас мал ұрланды

Шығыс Қазақстан облысында 70 бас мал ұрлаған қылмыстық топ ұсталды.

Бұл туралы ішкі істер министірлігі хабарлады.

70-тен астам мал басын ұрлағандар 47 миллионнан астам шығын келтірді. 4 күдікті қолға түсті. Олар етті елдің оңтүстігінде саудалады. 

«Мал басының бір бөлігі тәркіленді. Тергеу барысында олардың иесіз жылқыларды саудалағаны, кейін мал ұстау орындарына жеткізіп, ары қарай жүк көліктерімен базарға тасымалдағаны анықталды», — деді ІІМ.  

Сонымен қатар, ұсталғандардан атыс қаруының бірнеше түрі және 60-тан астам патрон тәркіленді. Қазір сараптама жасалып жатыр. Айыпталушылар соттың санкциясымен қамалды. Тергеу жүргізіліп, олардың осыған ұқсас басқа да қылмыстарға қатысы бар-жоғы тексеріліп жатыр.