Сербия Қазақстанға 1 млн еуро беріп, көмектесті

10 мамыр күні «Қазақстан халқына» қорының есепшотына Сербия үкіметінен су тасқынынан зардап шеккен аудандарда үй салу үшін 1 миллион еуро түсті. Бұл туралы ОКҚ сайты мәлімдеді, деп хабарлайды Orda.kz порталы.

«Бұл жәрдем екі ел арасындағы ынтымақтастық деңгейін көрсетеді және шетелдіктердің біздің қызметімізге  артқан сенімі мен көмек бөлудегі ашықтықты көрсетеді», - деді «Қазақстан халқына» қорының басқарма төрағасы Болат Жәмішев.

2024 жылдың 10 мамырдағы жағдай бойынша табиғи апаттан қираған тұрғын үйлерді салуға қордан бөлінген 10 миллиард теңгеден бөлек қосымша 5,3 миллиард теңге жиналған. 

Айта кетейік, 2024 жылғы 6 мамырда екі елдің басшысы Қасым-Жомарт Тоқаев пен Александр Вучич телефон арқылы сөйлескен болатын.  Президенттер екіжақты ынтымақтастықты жандандыру, бұрын қол жеткізілген келісімдерді жүзеге асыру және Қазақстан президентінің Белградқа алдағы сапарын ұйымдастыру мәселелерін талқылады.

Еске сала кетейік, Қазақстан 2014 жылы алапат су тасқынына байланысты Сербияға шатыр, дәрі-дәрмек пен ең қажетті заттарды жіберіп, гуманитарлық көмек көрсеткен болатын.