Сауд Арабиясы Корольдігінің елшісі Тоқаевтың Таяу Шығыстағы күрделі жағдайда көрсеткен нық әрі дәйекті қолдауына алғыс білдірді

Мемлекет басшысы Сауд Арабиясы Корольдігінің Қазақстан Республикасындағы елшісі Файсал Әл-Кахтаниді қабылдады. Файсал Әл-Қахтани елінің Қазақстан Республикасымен стратегиялық серіктестікті тереңдетуге берік ниетті екенін білдірді, деп хабарлайды  Orda.kz  Ақордаға сілтеп.  

Оның айтуынша, жақында қол қойылған инвестицияларды өзара қорғау және ынталандыру туралы келісімдер, сондай-ақ мемлекетаралық Үйлестіру кеңесін құру жөніндегі келісім өзара тиімді байланыстарды кеңейтуге жаңа мүмкіндіктер ашады.

Сонымен қатар дипломат Қасым-Жомарт Тоқаевтың Таяу Шығыстағы күрделі жағдайға байланысты көрсеткен нық әрі дәйекті қолдауы үшін Сауд Арабиясының жоғары басшылығының шынайы алғысын жеткізді.

Ол сондай-ақ Қазақстанның қасиетті Түркістанда ықтимал бейбіт келіссөздер өткізуге алаң ұсыну бастамасының өзектілігін атап өтті.

Қасым-Жомарт Тоқаев Сауд Арабиясымен және Парсы шығанағы елдерімен ынтымақтастықты тағы да растады, сондай-ақ өңірде тұрақтылық, қауіпсіздік және орнықты дамуды қамтамасыз етуге бағытталған күш-жігерге алдағы уақытта да қолдау көрсетуге дайын екенін мәлімдеді.

Кездесу соңында президент Қос қасиеттің қызметшісі – Салман бен Абдулазиз Әл Саудқа және Тақ мұрагері – премьер-министр Мұхаммед бен Салман Әл Саудқа жылы сәлемін жолдап, Сауд Арабиясының бауырлас халқына амандық пен өркендеу тіледі.