Сағын сындыру үшін жасалған әрекет: Заңгер Әділетхан Молдаханның інісі мәлімдеме жасады

Ұсталған белгілі заңгер Әділетхан Молдаханның інісі Әзімхан Молдахан мәлімдеме жасап, көпшіліктен араша түсуді өтінді. Ол ағасына тағылған айыптарды толықтай жоққа шығарып, мұны оның сағын сындыру үшін жасалған әрекет деп бағалады, деп хабарлайды Orda.kz. 

Оның айтуынша, заңгердің үстінен екі бірдей қылмыстық бап бойынша іс қозғалған. Біріншісі — қазақ қыздарына тіл тигізген ресейлік блогерлердің дауына қатысты 174-бап (ұлтаралық араздық қоздыру). Екіншісі — әл-Фараби даңғылындағы жол апатына қатысты 274-бап (жалған ақпарат тарату). Әзімхан ағасының Алматыдағы апат туралы айтқандары айнымас шындық екенін, сол себепті бұл оны темір торға жабуға негіз болмауы тиіс екенін қадап айтты.

Еске салсақ, бұған дейін Әділетхан Молдахан Алматыдағы жантүршігерлік апатқа қалалық полиция басшысы орынбасарының қатысы болуы мүмкін екенін айтып, дабыл қаққан еді.

Ол сол түні бірнеше көліктің Достық даңғылынан бастап заңсыз жарыс ұйымдастырып, сағатына 250 шақырым жылдамдықпен жүйткігенін, олардың арасында жалған нөмір таққан шенділердің көлігі болғанын ашық мәлімдеген болатын.

Оқи отырыңыз: 

• Ұсталған Әділетхан Молдахан туралы не белгілі?
• Алматыда заңгер Әділетхан Молдаханның ұсталғанын полиция растады
• Алматыдағы бес көлік жарысып, үш адам қаза болған шулы оқиғаға қатысты қылмыстық іс қозғалды