Ресейге қашқан қазақстандық сепаратисті Украинадағы соғысқа жіберді

Ресейге қарай шекараны заңсыз кесіп өткені үшін сотталған Қазақстан азаматын Украинадағы соғысқа жіберді, деп хабарлайды Orda.kz. 

Ресейлік Ura.ru ақпарат агенттігі құқық қорғау органдарындағы дереккөздеріне сүйене отырып, Қазақстан азаматы Курган облысында Ресей шекарасын заңсыз кесіп өткені үшін бір жыл үш айға қоныс колониясына қамалғанын хабарлады. Кейін ол сол жерден майданға аттанған.

Сол агенттік бұған дейін Курган облысының шекарасын екі Қазақстан азаматы заңсыз кесіп өткенін жазған еді. Олар көмір тиелген жүк вагонына мініп,  тығылып өткен. Өз сөздеріне қарағанда, Қазақстанда оларды сепаратизм үшін қылмыстық қудалау күтіп тұрған. Ресей құқық қорғау органдарының мәліметінше, сол екі адамның біреуі қазір Ресей әскері қатарында қызмет етіп жүр, ал екіншісінің тағдыры белгісіз.

«Орда» редакциясы Қазақстан азаматтарын елге қайтарып алу мәселесі бойынша ҚР Бас прокуратурасына сұрау жолдайды.

«Орда» редакциясы Украинадағы соғысқа қазақтар қалай алынатынын жазған болатын.

Бұған дейін Orda.kz редакциясы Ресейдегі қазақтарға хабарласып олардың тұрмысы жайлы сұрастырып, мақала жариялаған еді. Жасыратыны жоқ, Ресейде тұратын қазақтардың арасында да соғысқа аттарғандар көп.