Павлодарда екі баласын терезеден лақтырып, өзі де секірген әйел ауруханадан шықты

Көпқабатты үйдің терезесінен екі баласын лақтырған Павлодар тұрғыны ауруханадан шықты, деп хабарлайды Orda.kz. 

Терезеден секірген 33 жастағы әйелдің жағдайы жақсарып, ауруханадан шықты. Ол 1,5 және 7 жастағы екі ұлын бесінші қабаттың кіреберіс терезесінен лақтырып жіберіп, кейін өзі секірген еді. Қайғылы оқиға шілде айында көпқабатты үйдің ауласында ойнап жүрген мектеп оқушыларының көз алдында болды. Балалар алдымен әйелдің үлкен ұлын терезеден итеріп жібергенін, содан кейін кішісін лақтырғанын, сосын өзі секіргенін көрді. Тұрғындар жедел жәрдем шақырып, науқастар ауруханаға жеткізілді. 

Павлодар облысының денсаулық сақтау басқармасының мәліметінше, дәрігерлер әйелдің бір жарым жастағы баласының өмірі үшін күресті. Сәби ауруханаға жеткізілгенде клиникалық өлім жағдайында болған. Дәрігерлер шұғыл түрде реанимациялық көмек көрсетіп, кейін баланы жансақтау бөліміне ауыстырды. Баланың ішкі ағзалары мен миы жарақаттанған еді.

Ал әйелдің үлкен ұлы 14 тамыз күні емделіп шықты. 

Айта кетейік, Жамбыл облысында өгей ұлын азаптаған ер адам шартты жазамен босап шықты.