Оқиға қайталанды: Шәріп Серіктің бұрынғы жұбайы Say Mo актерден көрген зорлық туралы айтты

Say Mo деген лақап атпен танымал әнші Мөлдір Есембек бұрынғы жұбайы, актер Шәріп Серіктен көрген зорлық-зомбылық туралы айтты, деп хабарлайды Orda.kz.

Instagram парақшасында ол былай деп жазды:

«Мұндай жағдайдың тағы қайталануы өте өкінішті. Дегенмен шындықты айту керек. Оның мұндай әрекетке барғанына таңғалып отырған жоқпын», – деді Say Mo.

Әншінің айтуынша, зорлық көрсететін адамдар эгоизмге бейім келеді. Олар өз кінәсін мойындамайды және әрекеттерін дұрыс санайды. Сондықтан өздерін өзгертуге тырыспайды, себебі өзін мінсізбін деп есептейді.

«Роза ханым, шынымды айтсам, таңғалып отырған жоқпын. Ол жігіттен бес жыл бұрын небір қорлық көрдім. Әлі күнге дейін психологиялық терапия алып жүрмін. Ол кезде қолымда нақты дәлел болмаған соң, бұл тақырыпты ашық көтеруге қорықтым. Себебі анасы – адвокат. Бір жағынан мені кінәлағандар көп болды, кейбір таныстарым менен теріс айналды», – деп жазды ол.

Ол актердің «Вавилон» тұрғын үй кешенінің алдында қол көтергені есіне түскенін айтты. Алайда сол жердің бейнежазбасын ала алмағанын айтқан.

«Сол түні болған оқиғаны егжей-тегжейлі баяндасам, ұзақ әрі қорқынышты әңгіме болар еді. Айтайын дегенім — көп қыздар «ол маған олай жасамайды», «мен оны өзгертемін» деп ойлайды. Бірақ шындық міне, көз алдымызда тұр», – деді Say Mo.

Айта кетейік, ірі кинокомпаниялар актер Шәріп Серікпен жасалған келісімшарттарды бұзып жатыр. Аталған мәлімдемелер оның актерлік мансабына кері әсер етті. Компаниялар келісімдерді жаппай тоқтатып жатыр.