Нұрлан Сабуровтың Ресейге оралуына мүмкіндік бар — заңгер

Стендап-комик Нұрлан Сабуров Ресей саясатына қатысты ұстанымын көпшілік алдында өзгерткен жағдайда Ресейге кіруге салынған тыйымды алып тастай алады. Бұл туралы РИА Новости агенттігіне Мәскеу және Мәскеу облысындағы құқықтық тәртіп орталығының жетекшісі, заңгер Александр Хаминский мәлімдеді, деп хабарлайды Orda.kz.

«Сабуровқа Ресей аумағына кіруге тыйым салу туралы шешімді сот тәртібімен даулауға ешкім кедергі келтірмейді. Ол әкімшілік талап-арызбен сотқа жүгініп, бұл шектеуді қайта қарауды сұрай алады. Алайда бұл жағдайда тыйым салуға негіз болған себептердің жойылғанын немесе бастапқыда мүлде болмағанын дәлелдеуі қажет. Осы орайда ең ықтимал әрі нәтижелі жол — Ресей саясатына қатысты өз ұстанымын жария түрде өзгертіп, содан кейін құзырлы органдарға тыйымды алып тастау немесе оның мерзімін қысқарту туралы өтініш беру», — деді заңгер. 

Сабуровқа Ресейге кіруге тыйым салу туралы шешім оның Ресейдің Украинаға қарсы соғысын ашық түрде сынауы, «антиресейлік мәлімдемелері», сондай-ақ көші-қон және салық заңнамасын жүйелі түрде бұзуы себепті қабылданған.

«Сабуровқа қойылған шектеу оның азаматтық-құқықтық мүмкіндіктерінен айырылғанын білдірмейді. Мысалы, ол Мәскеу маңындағы өзіне тиесілі коттеджді еркін сата алады. Мұндай әрекетке тек оның шетелдік агенттер тізіміне енгізілуі ғана кедергі болуы мүмкін», — деп атап өтті Александр Хаминский. 

Ал заңгер Евгения Сабитованың айтуынша, Нұрлан Сабуров есептілікті уақтылы тапсырып, салықтарды дер кезінде төлеген жағдайда Ресей аумағындағы бизнесін жалғастыра алады.

Еске салсақ, екі күн бұрын ресейлік БАҚ белгілі әзілкеш Нұрлан Сабуровтың 50 жылға Ресейге кіре алмайтынын мәлімдеген болатын.

Оқи отырыңыз:

• Нұрлан Сабуров Қазақстанға оралды
• Әзілкеш Нұрлан Сабуров Ресейде миграциялық заңды бұзды деген күдікпен ұсталды
• БАҚ-та Нұрлан Сабуровтың шетелдегі жылжымайтын мүліктері туралы ақпарат таралып жатыр