Мыңдаған алматылық «Реалды» қарсы алды: әуежай мен қонақүй алдында ұзын-сонар кезек

Алматыда «Реал Мадрид» ойыншыларын көруге мыңдаған жанкүйер жиналды – әуежайдан бастап қонақүйге дейін халық легі үзілмеді, деп хабарлайды Orda.kz.

Алматылықтар Еуропаның ең атақты клубтарының бірін ерекше қуанышпен қарсы алып жатыр. Қалада футбол мерекесі көрініс тапты. Алматы әуежайының маңында қолдарына мерч пен жалауша ұстаған жастар «Қайрат» деп ұрандатуда. Әр он қадам сайын қауіпсіздік шараларына жауапты полицейлер тұр. Алайда жанкүйерлер спортшыларды көре алған жоқ. «Реал» футболшылары әуежайдан бірден дайын тұрған автобусқа отырып қонақүйге бет алды. 

Жанкүйерлердің көптігі сонша, ұзын-сонар кезек пайда болды. Сонымен қатар, алматылықтардың бір бөлігі «Реал Мадрид» футболшылары орналасқан «InterContinental» қонақүйінің алдына жиналды.  Келген жұртшылық бұл жерден де футболшыларды алыстан ғана сығалап көргендері болмаса, анық көру мүмкін емес болды.  Жалпы бұл рейсті Flightradar24 дерегінше, онлайн 22 мыңнан астам адам бақылаған.

Еске сала кетейік, 28 қыркүйекте мадридтік «Реал» Чемпиондар лигасының топтық кезеңінде Алматының «Қайратына» қарсы өтетін сыртқы матчқа арналған құрамын жариялады.

Сондай-ақ, күні кеше мадридтік «Реал» «Атлетикоға» ірі есеппен есе жіберді. «Метрополитанода» өткен алтыншы тур ойыны 5:2 есебімен аяқталды.

Айта кетейік, 30 қыркүйекте «Қайрат» Чемпиондар лигасының жалпы кезеңінде алғаш рет өз алаңында Еуропаның ең мықты клубтарының бірін қабылдайды. Билеттер ресми түрде 23 қыркүйекте небары төрт сағат ішінде сатылып кетті.