«Мен ешқашан акция иеленген емеспін»: ҚТЖ-ның экс-президенті Күлекеев Orda.kz материалына жауап берді

Orda.kz редакциясына «Қазақстан темір жолы» компаниясының экс-президенті Жақсыбек Күлекеевтің қолы қойылған хат келді. Ол біздің «Мемлекет бұрынғы ҰҚК басшысымен байланысты компаниядан темір жолдарды қалай қайтарып алды?» атты материалымызға жауап берді.

Материалда қаңтар оқиғасынан кейін демонополизацияланған «Каскор-Транссервис» АҚ туралы жазылды. Жуырда бұл компаниядан Маңғыстау облысындағы магистральдық теміржол желілері мемлекет меншігіне қайтарылған. Кәсіпорын бизнеске тарифтерді өз бетінше белгілеп, нарықта теңсіздік туғызған.

Жақсыбек Күлекеев өз хатында өзі мен отбасы мүшелерінің ешқашан «Каскор-Транссервис» АҚ акционері болмағанын мәлімдеді.

«Ең алдымен, мен, Жақсыбек Әбдірахметұлы Күлекеев, ешқашан «Каскор-Транссервис» компаниясының акцияларына ие болмағанымды мәлімдеймін. Дегенмен, кейбір жылдары бұл компанияның директорлар кеңесінің мүшесі болдым, онда ұлттық компания – «ҚазМұнайГаздың» мүддесін қорғадым», – деді Күлекеев.

«Каскор» жекешелендіру кезінде қалай бөлінді?

ҚТЖ-ның экс-президентінің айтуынша, жекешелендірудің алғашқы күндерінен бастап «Каскор» акционерлік қоғамының акционерлері екі ұлттық компания – «ҚазМұнайГаз» және «Қазақстан темір жолы» болған. Кейін кәсіпорын акционерлік қоғамға айналып, Маңғыстау облысының әділет органдарында тіркелген.

Акциялардың 49%-ы қызметкерлерге сатылып, қалған үлесті «ҚазТрансСервис» ААҚ (ҚТЖ-ның еншілес құрылымы) мен «ҚазМұнайГаз» Сауда үйі» ЖАҚ өзара бөліскен.

«Каскор-Транссервис» акционерлік қоғамының орналастырылған акцияларының 10 пайыздан астамына ие акционерлердің жалпы саны – бесеу. Олардың ішінде ұлттық компания «Қазақстан темір жолы» – 13,4% үлеске, ал «ҚазМұнайГаз»  – 12,87% үлеске ие», – деп нақтылады Күлекеев.

Күлекеев компаниядан қашан кетті ме?

Жақсыбек Күлекеевтің айтуынша, «Каскор-Транссервис» АҚ құрылған күннен бастап оның директорлар кеңесіне «ҚазМұнайГаз» бен «Қазақстан темір жолының» өкілдері кірген.

«2014 жылы мен «ҚазМұнайГаз» ұлттық компаниясының топ-менеджері ретінде директорлар кеңесіне қосылдым. Кейін «ҚазМұнайГаз» ұлттық компаниясы АҚ-ның үлесі сатылғаннан кейін менің директорлар кеңесіндегі мүшелігім кері қайтарылды», – деді ол.

Оның айтуынша, «Каскор-Транссервис» АҚ-ның магистральдық кіреберіс жолдарын мемлекет меншігіне қайтару туралы шешім өткен жылы қабылданған.

«Мен соңғы жылдары «Каскор-Транссервис» АҚ директорлар кеңесінің жұмысына қатысқан жоқпын. Бірақ былтыр уәкілетті органның шешімімен «Каскор-Транссервис» АҚ кіреберіс жолдары магистральдық деп танылып, мемлекеттік меншікке қайтарылғанын білемін», – деді Күлекеев.

Жақсыбек Күлекеев өзінің соттылығы туралы да айтты. Оның айтуынша, 2021 жылы Нұр-Сұлтан (қазіргі Астана) қаласының соты оны толық ақтаған.

2008 жылы ҚТЖ-ның бұрынғы басшысы сыбайлас жемқорлық бойынша айыпталған еді. Тергеу нұсқасы бойынша, Күлекеев мемлекеттік сатып алу конкурсын өткізу кезінде қызметтік өкілеттігін асыра пайдаланып, компания қаражатына қымбат бағаға Lexus автокөлігін сатып алған, ал оны оның отбасы пайдаланған.

Сот Күлекеевті үш жылға бас бостандығынан айырды. Жарты жылдан кейін ҚТЖ-ның экс-президенті шартты түрде мерзімінен бұрын босап шықты, ал кейінірек толық ақталды.