Мәжіліс депутаттары Жомарт Ертаевтың қайта түрмеге «аттанатынын» мәлімдеді

Мәжіліс депутаты Абзал Құспан Жомарт Ертаевты шартты түрде мерзімінен бұрын босату туралы қаулының күші жойылып, оның темір тордың арғы жағына қайта оралатынын мәлімдеді, деп хабарлайды Orda.kz.

Мәжіліс депутаты Абзал Құспан Facebook парақшасында Жомарт Ертаевты босату туралы қаулының күші жойылғанын мәлімдеді.

«Ертаевқа қатысты сот қаулысы бүгін бұзылды. Өтінішімді қолдап, әділ шешімге ықпал еткен Бас прокуратура, Алматы облысының прокуроры мен сотына, сондай-ақ мәселені алғаш көтерген журналистер қауымына алғыс айтамын» деп жазды Абзал Құспан.

Мәжілістің тағы бір депутаты Ермұрат Бәпи Жомарт Ертаевтың түрмеге қайта оралатынын өзінің  Facebook парақшасында жариялады.

«Мемлекет қаржысынан 144 млрд теңге ұрлап, түрмеге қамалған Жомарт Ертаев бұдан бірер ай бұрын бостандыққа шығып кеткені еді. Танымал депутат-адвокат Абзал Құспан бұл шешімге қарсы ҚР Бас прокуратурасына протест білдіру жөнінде талап арыз жазған еді. Бүгін сол талап орындалып, прокуратураның қарсылық келтіруі бойынша Жомарт Ертаев қайтадан қамауға алынатын болды» деп жазды Бәпи.

Еске салсақ, 2020 жылдың қарашасында Жомарт Ертаев Bank RBK-тен 2011–2017 жылдар аралығында 144 миллиард теңге жымқырды деген айыппен кінәлі деп танылып, 11 жылға бас бостандығынан айырылған еді.