Лондонда жаппай көтеріліс: 100 мыңнан астам адам көші-қонға қарсы шеруге шықты

2025 жылдың 13 қыркүйегінде  Лондон қаласының орталығында ондаған мың адам қатысқан ауқымды наразылық акциялары өтті. Трафальгар алаңында оңшыл белсенді Томми Робинсон ұйымдастырған «Патшалықты біріктірейік»  (Unite the Kingdom) атты марш өтті. Полиция мәліметіне сәйкес, бұл акцияға шамамен 110 мың адам қатысты, деп хабарлайды Orda.kz.       

Шеруге қатысушылар үкіметтің көші-қон саясатына және Премьер-министр Киир Стармерге қарсы ұран айтып, наразылық білдірді. Көптеген адам қолдарында америкалық консервативті белсенді Чарли Кирктің портретін ұстап тұрды.  АҚШ-та Трамптың жақтаушысы Чарли Киркті сөз сөйлеп тұрғанда атып өлтірген болатын.  Робинсонның айтуынша, митингтің интернеттегі тікелей трансляциясын шамамен бір миллионға жуық адам көрген.

Шеруге шыққандар «Қайықтарды тоқтатыңдар» және «Оларды үйлеріне қайтарыңдар» деген көші-қонға қарсы ұрандары бар жалаулар көтеріп жүрді.

Күннің алғашқы жартысы бейбіт түрде өтсе де, кейіннен полициямен қақтығыс болды. Құқық қорғау органдарының мәліметінше, шерушілер тәртіп сақшыларына шыны бөтелкелер, жарылғыш заттар (файерлер) және металл заттар лақтырған. Мақала жарияланған сәтте тоғыз адам ұсталған. Қала көшелеріне қосымша 1600-ге жуық полиция қызметкері шығарылды, оның 500-і көршілес муниципалитеттерден тартылған.

Сол уақытта Лондонның басқа бөлігінде «Фашизмге қарсы марш» өтті. Бұл шараны «Нәсілшілдікке қарсы тұрайық» атты қозғалыс ұйымдастырған. Бағалауларға сәйкес, бұл акцияға шамамен бес мың адам қатысқан.

Полиция екі топты бір-бірінен бөлу үшін бөгеттер қойды, алайда әлеуметтік желілерде тараған видеолар мен кадрларға қарағанда, олардың арасында қақтығыстар орын алған.

Наразылықтар заңсыз мигранттарды мемлекеттік қаражат есебінен қонақүйлерге орналастыруға қатысты дау-дамайлар, сондай-ақ Ішкі істер министрлігінің жаңа басшысының тағайындалуы мен үкіметтің көші-қон саясатына байланысты өршіген. Қоғамдағы наразылықты күшейткен тағы бір жағдай – Эппинг қаласындағы оқиға болды: қонақүйде тұрған, 38 жастағы Эфиопиядан келген босқын кәмелетке толмаған қызға жыныстық қол сұғушылық жасады деп айыпталған.

10 қыркүйекте Францияда да жаппай наразылықтар өтті. «Бәрін тоқтатайық!» деген ұранмен шыққан шерушілер ондаған қалада көшелерге шығып, жолдарды, вокзалдарды және мектептерді бөгеп, от жағып, баррикадалар тұрғызды. Бұл толқуларға үкіметтің 2026 жылға арналған бюджет жобасы себеп болған.