Қысқа дайындық басталды: үкімет жылу электр орталықтарын жөндеуге ақша бөлуді көздеп отыр

Үкімет қысқа дайындық бойынша отырыс өткізді. Энергетика министрлігі жөндеу жұмыстарына 17 млрд теңге бөлінгенін мәлімдеді, деп хабарлайды Orda.kz порталы.

«Биыл республиканың электр стансаларында 10 энергоблокты, 55 қазандықты және 45 турбинаны жөндеу жоспарланған. Энергия көздерін дайындауға ҚР Үкіметінің резервінен алдын ала 17 млрд теңге бөлінді. Мемлекет қабылдап жатқан шаралар 2024 жылы салаға шамамен 327 млрд теңге тартуға мүмкіндік береді, бұл өткен жылғы деңгейден 44%-ға артық» делінген энергетика министрлігінің хабарламасында. 

Олжас Бектенов ЖЭО жөндеу жұмыстары мерзімінде аяқталмаса, меншік иелері мен әкімдіктерге шара қолданылатынын айтты. 

«Энергетика министрлігі әр объект бойынша маған апта сайын баяндап отыруға тиіс. Егер жұмыстар мерзімінде аяқталмай, сапасы төмендеп кететін болса, онда меншік иелерімен қатар, әкімдіктерге қатысты да шара қабылданылатын болады», — деді Олжас Бектенов. 

Қазақстан халқын қыста жылумен қамтамасыз ететін жалпы саны 37 жылу электр орталығы (ЖЭО) бар. Олар 40-50 жылдан бері жұмыс істеп тұр. Көбі ескірген, тозу деңгейі 90-95%-дан асады. Кейінгі 30 жылда елімізде бірде-бір ЖЭО салынбаған.