Құмар ойынға әуестігі үшін 16 мемлекеттік қызметкер жұмысынан айырылды

Орал қаласында 24 мемлекеттік қызметші құмар ойындарға қатысқаны үшін тәртіптік жазаға тартылды. 16 қызметкер лауазымынан босатылды, деп хабарлады Orda.kz.

Бас прокуратура ақпараты бойынша, тексеру барысында қалалық әкімдік, мемлекеттік кірістер басқармасы мен полиция департаментінің бірқатар қызметкері букмекерлік кеңселер арқылы, оның ішінде онлайн платформаларда да бәс тіккені анықталған.

«2024 жылғы 9 қыркүйектен бастап мемлекеттік қызметшілердің құмар ойындарға және бәс тігуге, соның ішінде интернет арқылы қатысуы — сыбайлас жемқорлыққа қарсы шектеулерді бұзу болып есептеледі. Аталған фактілер бойынша 24 лауазымды тұлға тәртіптік жазаға тартылды, оның ішінде 16 адам қызметінен босатылды», — деп хабарлады Бас прокуратура.

Прокуратураның мәліметінше, қалалық әкімдіктің бір қызметкері OLIMPBET букмекерлік компаниясы арқылы өзінің ойын шотына 34 миллион теңгеден астам қаражат аударған. Тыйым салынғаннан кейін де ол қосымша 1,7 миллион теңге салып, оның 971 мың теңгесін ұтылып қалған. Бұл тұлға да қызметінен шеттетілген.