Кремльдегі «құпия» шәй: Путин мен Назарбаев жүздесті

Ресей президенті Владимир Путин Мәскеуде Қазақстанның экс-президенті Нұрсұлтан Назарбаевты қабылдады, деп хабарлайды Orda.kz.

Кремльдің ресми telegram-арнасы жүздесудің өткені туралы видеоны көрсеткенімен, тараптар талқылаған мәселелердің мазмұнын құпия сақтады.

Бұл тараптардың биылғы мамыр айынан бергі алғашқы кездесуі. Бұған дейін Нұрсұлтан Назарбаев Ресей астанасына 2024 жылдың желтоқсанында барды.

Еске сала кетейік, Назарбаев 2019 жылы мемлекет басшысы өкілеттігін Қасым-Жомарт Тоқаевқа өз еркімен тапсырған еді. Ол биліктен кеткеннен кейін де бірқатар стратегиялық құзыреттерді иеленіп, «Елбасы» мәртебесіне ие болды. Алайда 2022 жылғы қаңтар оқиғасынан соң ол Қауіпсіздік кеңесінің төрағалығынан кетіп, кейінірек конституциялық референдум нәтижесінде барлық арнайы артықшылықтарынан айырылды.

Кездесу Владимир Путиннің бұған дейін Қасым-Жомарт Тоқаевты қабылдаған жеке пәтерінде өтті.