Қонақ үйде оқушымен бірге ұсталған мұғалім туралы жаңа деректер шықты

Оқу-ағарту министрі Ғани Бейсембаев қонақ үйде оқушымен ұсталған мұғалімге қатысты мәлімдеме жасады, деп хабарлайды Orda.kz.

Министрдің айтуынша 2025 жылғы 20 мамырда үкіметтегі брифингте 14 жастағы оқушыны зорлады деп күдікке ілінген мұғалімге қатысты резонанс тудырған істі «өрескел әрі мүлдем жол беруге болмайтын жайт» деп айтты.

«Біз жедел әрекет еттік. Өздеріңіз білесіздер, бізде балалардың құқығын қорғау мен қауіпсіздігіне қатысты кез келген жағдай бойынша арнайы алгоритм бар. Балалардың құқықтарын қорғау комитеті жұмыс істеп жатыр. Біз дереу тиісті шара қабылдадық. Мен мынаны ерекше атап өткім келеді: бұл жағдай Алматы қаласында емес, Алматы облысында болғаны анықталды. Және «мұғалім» деп аталған адам мектепте ешқашан жұмыс істемеген. Сондықтан бұған да назар аудару қажет. Алайда бұл оның мойнындағы жауапкершілігін азайтпайды», – деді Ғани Бейсембаев.

Министрдің айтуынша, бұл жағдайға заң аясында баға берілуі тиіс, қазір тергеу амалдары жүріп жатыр.

Бұған дейін Orda.kz редакциясы Алматы қаласының 33 жастағы домбыра пәнінің мұғалімі 14 жастағы оқушы қызбен бірге Алматы облысындағы Өтеген батыр ауылындағы «У Розы» қонақ үйінде ұсталғанын жазған еді.