Комадан шығып, есін жиған сарбаз үйіне оралды

Қостанайда вокзал перронында өлім аузынан қалған сарбаз Нұржігіт Әбділпаттаны туған-туыстары, достары мен таныстары гүл шоқтары мен шарлармен қарсы алды, деп хабарлайды Orda.kz. 

Үш ай ес-түсінен айрылып жатып, әрең есін жиған Нұржігіт Әбділпатта әскерге кеткенде үйніе осылай ораламын деп ойламағаны анық. Дегенмен оны әскерден оралғандай  салтанатты түрде қарсы алды. Сарбазды қарсы алуға оның туыстарымен қатар Нұржігіттің әкесі бастаған 10-аймақтың іздеу жасағының еріктілері де келді. Көпшілік қуаныштан көз жасын тыя алмады. Оқиға кейіпкері болса жай ғана жымиып, жиналғандарды құшақтай берді.

Сарбаздың ата-анасы  қазір тергеу амалдары аяқталғанын айтты. Кездесулер өткізіліп, айғақтар берілді. Мемлекеттік сараптама тамыз айының соңына дейін жалғасады, одан кейін іс әскери сотқа жіберіледі.

Нұржігіт  болашақтағы жоспарларымен бөлісті, бірінші кезекте, әрине толық оңалу. Содан кейін жас жігіт өзін-өзі дамытумен айналысып, тіс дәрігері болу үшін оқуын жалғастырмақшы.

Естеріңізге сала кетсек, кеше ғана Orda.kz  жансақтау бөлімінен жарымжан халде шығарылған сарбаз туралы жазған болатын.