«Киімін шешіп, еденге жатты»: Оңтүстік Кореяның экс-президенті тергеуге қайта келмеді

Оңтүстік Кореяның бұрынғы президенті Юн Сок Ёль соттың бірнеше айыптау бойынша жауап алуға шақырғанына қарамастан, бұл жолы да келмеді, деп хабарлайды Orda.kz.

Тергеушілердің мәліметінше, 1 тамыз күні Юн Сок Ёль тергеу изоляторында киімін шешіп, еденге жатып алған. Осылайша ол тергеуге барудан бас тартқанын білдірген.

Жаңа президент Ли Чжэ Мён тағайындаған тергеу тобы оны мәжбүрлеп жеткізуге рұқсат алды. Мемлекет басшысы экс-президенттің әрекеті қоғамның жіті бақылауында екенін айтып, алдағы уақытта қатаң шара қолданылатынын ескертті.

Еске сала кетейік, былтыр желтоқсанда Юн Сок Ёль елде әскери жағдай жариялаған. Қаңтар айында ол қамауға алынды. Бұл — Оңтүстік Корея тарихында мемлекет басшысының тұңғыш рет тұтқындалған оқиғасы. Ол 15 қаңтарда ұсталып, 16 қаңтарда жауап алудың екінші кезеңіне қатысудан бас тартқан болатын. Тергеу аясында Юн Сок Ёльдің жұбайы да күдікті ретінде танылды.

Конституциялық сот экс-президентке импичмент жариялау туралы шешімді бекіткеннен кейін екі айдан соң елде кезектен тыс сайлау өтті. Сайлауда «Тобуро» демократиялық партиясының өкілі, 61 жастағы Ли Чжэ Мён жеңіске жетті.