Қазақстандықтардың банк деректері салық органдарына берілетін болады

Қаржы министрлігі банктерді азаматтар мен компаниялардың шоттары туралы толық мәліметті Мемлекеттік кірістер комитетіне беруге міндеттеуді ұсынды, деп хабарлайды Orda.kz.

ҚР Қаржы министрлігі жаңа бұйрық жобасын әзірледі. Құжатқа сәйкес, банктер бұдан былай жеке және заңды тұлғалардың шоттары бойынша толық мәліметті Мемлекеттік кірістер комитетіне (МКК) тұрақты түрде жолдап отыруы тиіс. Бұл туралы ақпарат «Ашық НҚА» порталында жарияланып, 29 қыркүйекке дейін қоғамдық талқылауға ұсынылған.

Бұйрық жобасына сәйкес, банктер салық органдарына мынадай ақпараттарды тапсырады:

• шот нөмірлері;
• шоттағы қалдықтар;
• ақша аударымдары туралы мәліметтер.

Қаржы министрлігінің түсіндіруінше, бұл бастама салықтық әкімшілендіруді күшейтуге және табыстарын жасырып жүрген тұлғаларды дер кезінде анықтауға бағытталған.

«Жобаның күтілетін нәтижесі – салықтан жалтаратын немесе табысын төмен көрсететін азаматтар мен компанияларды дер кезінде анықтау. Бұл мемлекеттік бюджетке түсетін кірісті арттырып, көлеңкелі экономиканың үлесін азайтады» деп жазылған құжат мәтінінде

Бұл жоба банктер мен Мемлекеттік кірістер комитеті арасындағы дерек алмасуды заңдастырып, жүйелі негізде жүзеге асыруға жол ашады.