Қазақстанда ЛГБТ жайлы үгіт-насихат үшін қылмыстық жауапкершілік енгізу ұсынылды

Мәжіліс депутаты Еділ Жаңбыршин ЛГБТ-ны ашық немесе жанама түрде насихаттаған адамдарды қылмыстық жауапкершілікке тартуды ұсынды, деп хабарлайды Orda.kz.

Еділ Жаңбыршиннің айтуынша бұл әркімнің жеке ісі. Брақ оны бұқаралық ақпарат құралдары немесе әлеуметтік желілер арқылы насихаттауға болмайды

«Біз бір топ депутаттармен бірге ЛГБТ-үгітке қарсы заң нормаларын әзірледік. Бірақ көп қарсылық болғандықтан ол ұсыныстар қабылданбады. Сол себепті петиция пайда болды. Халық қолдады, комиссия құрылды. Қазір ғалымдар мен сарапшылар бұл құбылыстың қаншалықты зиян екенін көріп отыр», – деді Еділ Жаңбыршин БАҚ сұрақтарына жауап бере отырып.

Ол бұдан кейін ЛГБТ-ны насихаттауға жауапкершілік енгізу мәселесін көтерді:

«Біз тек тыйым салумен шектелмеуіміз керек. Егер бұл тыйымды бұзып, әлеуметтік желілерде, БАҚ-та немесе жанама жолдармен ЛГБТ-ны насихаттау жалғасатын болса, менің ойымша, әкімшілік қана емес, қылмыстық жауапкершілікті де қарастыру қажет», – деді депутат.

Еске сала кетсек, бұл тақырыпта Orda.kz редакциясы белгілі психолог-сарапшы, Орта Азия психологиялық сараптама институтының басшысы Анна Құдияровамен кеңескен еді. Сарапшы бұндай бағдары (ориентация) басқа адамдарды қазір ешкім «ауру» санатына жатқызбайтынын атап өтті. Толығырақ материалымыздан оқыңыз.