Қаңтардағы ҰБТ басталды: талапкерлердің 75%-ы тестілеуді қазақ тілінде тапсырады

10 қаңтар 2026 12:00 Ләззат Сұңқар

Фото: Әлеуметтік желіден

Бүгін, 2026 жылғы 10 қаңтарда, қаңтар айындағы Ұлттық бірыңғай тестілеу (ҰБТ) басталды. Ол 10 ақпанға дейін жалғасады, деп хабарлайды Orda.kz.

Тестілеуге қатысуға шамамен 187 мың адам өтініш берді. Бұл өткен жылмен салыстырғанда 20 мыңға көп. Олардың 75,2%-ы тестілеуді қазақ тілінде, 24,6%-ы орыс тілінде, ал 189 адам ағылшын тілінде тапсыруды таңдаған.

«Айта кету керек, өтініш беру кезінде талапкерлер тестілеудің күнін, уақытын және тапсыратын орнын өздері таңдайды. Бейіндік пәндер бойынша ең жиі таңдалған комбинация — «Математика–Физика» (19,2%). Бұл — болашақ мұғалімдер, инженерлер, механиктер, техниктер мен технологтар, энергетиктер және құрылыс саласының мамандары. Одан кейін «Биология–Химия» (16,9%) және «Шығармашылық емтихан» (9,7%) комбинациялары тұр. Тиісінше, бұл — болашақ медицина қызметкерлері мен шығармашылық сала мамандары.
Тестілеу барысында калькулятор, химиялық элементтердің периодтық жүйесі (Менделеев кестесі) және тұздардың ерігіштік кестесін пайдалануға болады. Ал апелляцияға талапкерлер тестілеу аяқталғаннан кейін 30 минут ішінде өтініш бере алады. Апелляцияға өтініш берген тестіленушінің сертификаты апелляциялық комиссия шешім қабылдағаннан кейін жеке кабинетінде тұрады» деп хабарлады Ғылым және жоғары білім министрлігі.

Ведомство 2026 жылы ҰБТ форматы өзгеріссіз қалғанын атап өтті. Талапкерлер бұрынғыдай үш міндетті пән және таңдауы бойынша екі бейіндік пән бойынша тапсырады. Жалпы тапсырмалар саны — 120. Оның ішінде 20 тапсырма «Қазақстан тарихы» пәніне, 10 тапсырмадан «Оқу сауаттылығы» мен «Математикалық сауаттылыққа», сондай-ақ екі бейіндік пәннің әрқайсысына 40 тапсырмадан беріледі.
Ең жоғары мүмкін болатын нәтиже — 140 балл.

Тестілеуге жалпы төрт сағат уақыт беріледі. Ал ерекше білім беру қажеттіліктері бар балалар үшін қосымша 40 минут уақыт қарастырылған.

Қаңтар айындағы ҰБТ-ға ақылы негізде шартты түрде жоғары оқу орнына күндізгі оқу нысаны бойынша қабылданғандар, басқа мамандықтарға ақылы негізде ауысқысы келетін студенттер, шығармашылық білім беру бағдарламаларынан басқа бағыттарға немесе педагогикалық мамандықтарға ақылы негізде ауысуды көздейтіндер, өткен жылдардың мектеп түлектері мен колледж бітірушілері, Қазақстан Республикасының азаматы емес қазақ ұлтының өкілдері, шетелде білім алған ҚР азаматтары, сондай-ақ өз қалауы бойынша ақылы негізде ЖОО-ға түсу үшін мектептегі бітіруші сыныптарда оқитын оқушылар қатыса алады.

Былтыр Ғылым және жоғары білім министрі Саясат Нұрбек мемлекет басшысының Educational Testing Service (ETS) компаниясы және Смитсон институты жетекшілерімен кездесулері жөнінде пікір айтты. Артынша ҰБТ жайлы сөз қозғап, ҰБТ сапасын күрт өзгерту үшін әлемдегі тестология саласындағы ең көне ұйым тартылатынын айтқан болатын.

Жаңартылған ҰБТ қазақстандық түлектердің халықаралық стандарттарға сай білімін анықтауға мүмкіндік береді. Тест сұрақтарының жаңа моделінде жасанды интеллект пен психометриялық әдістері пайдаланылады.

Тақырып аясында ұсынамыз:

Жаңалықтар

барлық жаңалықтар