Камера алдындағы қанды қылмыс: Екібастұзда ер адам пышақ жарақатынан қайтыс болды, әйел ауруханада

Екібастұздағы көпқабатты үйлердің бірінің кіреберісіндегі бейнекамераға түскен қорқынышты бейнелер телеграм-арналарда тарап жатыр. Бейнеде әйелдің аққан қанын шұбыртып баспалдақпен түсіп бара жатқаны көрінеді. Бір сәтте ол есінен танып құлайды. Оның соңынан қолына пышақ ұстаған басқа әйел түсіп келе жатқаны бейнекамераға жазылған, деп хабарлайды Orda.kz.       

Кадрдан әйелдің пышақпен жерде жатқан әйелдің бетінен осып өтіп,  басын еденге бірнеше рет ұрғаны көрінеді.

Павлодар облысының полиция департаменті оқиға 9 қаңтарда Екібастұздағы пәтерлердің бірінде болғанын растады.

«Тұрмыстық жанжал барысында, болжам бойынша, мас болып төбелескен адамдардың біріне бірнеше рет пышақ жарақаты салынып, сол жерде көз жұмған. Бұдан басқа, тағы бір әйел пышақ жарақатымен медициналық мекемеге жеткізілді» деп жазылған ресми хабарламада. 

Күдікті ұсталды, қазір ол уақытша ұстау абақтысында. Адам өлтіру және адам өлтіруге оқталу фактісі бойынша қылмыстық іс қозғалды.

 Еске салсақ, 8 қаңтар күні дәл осы Екібастұзда жеке сектордағы үйлердің бірінен өрт шығып, 41 жастағы ер адамның денесі табылған болатын.