Қамауға алынған журналист Әсем Жәпішеваның соты онлайн өтеді

Журналист Әсем Жәпішеваның адвокаты Ғалым Нұрпейісов істің мән-жайын айтты, деп хабарлайды Orda.kz.

Бүгін журналист Әсем Жәпішеваны сатиралық Qaznews24 паблигінің қамауға алынған авторын қолдау мақсатында өткізген пикетінде полиция ұстап әкетті.

Тіл кеспек жоқ telegram-арнасының мәліметінше, журналист адвокаты Ғалым Нұрпейісов Жәпішеваға әкiмшiлiк құқық бұзушылықтың 488-бабы, 7 тармағы бойынша айып тағылғанын мәлімдеді. Сот бүгін онлайн өтеді. 

Еске сала кетейік, 17 қаңтар сатиралық Qaznews24 паблигінің авторы Темірлан Еңсебекке ұлтаралық араздық қоздырды деген айып тағылған болатын. Еңсебек 2 жылдан 7 жылға дейін бас бостандығынан айырылуы мүмкін.

Темірлан Еңсебекті қолдау үшін журналист әрі Art of Her журналының бұрынғы бас редакторы Руслан Бикетов жалғыз өзі пикетке шықты. Бес минут ішінде журналисті полиция алып кетті. Ол ҚР бейбіт жиналыстарды ұйымдастыру және өткізу тәртібі туралы заңнамасын бұзғаны үшін 15 тәулікке қамалды.