Яна Легкодимованы өлтіргендерге апелляциялық сот шешімі шықты

Атырау облыстық сотының қылмыстық істер жөніндегі сот алқасы 23 жастағы Яна Легкодимованы өлтіру ісі бойынша апелляциялық шағымдарды қарап, үкімді өзгеріссіз қалдырды, деп хабарлайды Orda.kz тілшісі.

Бұған дейін Атырау облысы қылмыстық істер жөніндегі мамандандырылған ауданаралық соты Ризуан Қайыржанов пен оның танысы Алтынбекті кінәлі деп танып, екеуіне де өмір бойына бас бостандығынан айыру жазасын тағайындаған болатын. Судья Зарема Хамидуллина олардың әрекетін ҚР ҚК-нің 99-бабы 2-бөлігінің 7 және 8-тармақтары («Алдын ала сөз байласу арқылы адамдар тобы жасаған және жалдау арқылы жасалған кісі өлтіру») және 202-бабы 2-бөлігінің 6-тармағы («Бөтеннің мүлкін қасақана жою») бойынша саралаған.

Сотталғандар үкімге шағым түсіргенімен, апелляциялық саты оны жеңілдетуге немесе күшін жоюға негіз таппады. Осылайша, бірінші сатыдағы сот шешімі заңды күшіне енді.

Тергеу нұсқасына сәйкес, Ризуан Қайыржанов қарым-қатынас әшкереленіп қала ма деп қауіптеніп, танысына Яна Легкодимованы өлтіруге көмектескені үшін 500 мың теңге ұсынған. Қызды тұншықтырып, кейін Орал өзеніне тастаған. Марқұмның сүйегі сегіз айдан кейін табылған. Іс бойынша негізгі дәлелдердің бірі – қаза тапқан қыздың жеке күнделігі болды.

Бұл іс Атырауда кең қоғамдық резонанс тудырды. Прокуратура мен марқұмның анасы өмір бойына жаза тағайындауды талап еткен еді. Енді бұл үкім сот шешімімен түпкілікті расталды.
 

 Оқи отырыңыздар:

• Зеленский соғыс басталған алғашқы күндері жұмыс істеген орнын көрсетті
• «Қарым-қатынас өзара келісіммен болды»: Зорлау айыбы тағылған шенеунікке қатысты тың дерек