Иттердің иесі 10 жастағы балаға жасалған шабуылға қатысты бейнежазбаны көрсетті

Алматы облысындағы Жалпақсай ауылында 10 жастағы балаға иттер шабуыл жасады. Бұл иттер оңалту орталығы аумағында болған. Оқиғадан кейін жергілікті билік иттерді орталық аумағынан алып кетуді талап еткен. Алайда орталық иесі бұған келіспей, бақылау камераларынан алынған бейнежазбаны жариялады, деп хабарлайды Orda.kz.

Орталықтың иесі иттердің орталық аумағындағы қоршаудың ішінде болғанын және ешқандай қауіп төндірмегенін айтады.

Оның айтуынша, жарақат алған бала досымен бірге қоршау маңында ұзақ ойнаған. Олар иттердің үргенін естісе де, ойындарын жалғастырған. Ойын кезінде балалар бір-бірін итеріп, сол сәтте олардың бірі оңалту орталығының ауласына құлап түскен.

«Иттер тек өз иелігін қорғауға тырысқан», — дейді орталық иесі. 

Айта кету керек, бұл оқиғаға байланысты сот-медициналық сараптамалар әлі жүргізілмеген.

Бұған дейін Алматы облыстық прокуратурасы бұл істі ерекше бақылауға алғанын мәлімдеген болатын.

Еске сала кетсек, Алматы облысында 10 жастағы Максим Головачёв есімді оқушыға ойын алаңқайында ойнап жүрген кезде бірнеше ірі төбет шабуыл жасап, ауыр жарақаттаған еді. Бет-аузы тырналған, иттер тістемеген жері қалмаған. Бала бір құлағынан айырылды.