Иранда «Росатом» қызметкерлері жұмыс істейтін АЭС аумағына снаряд құлады

Иран Бушер атом электр станциясы аумағына снаряд құлағанын мәлімдеді. Бұл станцияда Росатом қызметкерлері жұмыс істейді, деп хабарлайды Orda.kz Tasnim агенттігіне сілтеме жасап. 

Иранның атом энергиясы ұйымының мәліметінше станцияға зақым келмеген. Зардап шеккендер де жоқ. Ұйым өкілдері мұндай әрекеттер барлық халықаралық нормаларға қайшы келетінін және бүкіл аймақ үшін орны толмас қатерге әкелуі мүмкін екенін мәлімдеді.

«Росатом» басшысы Алексей Лихачёв жұмыс істеп тұрған ядролық энергетика нысандарына жасалған соққыларды «халықаралық қауіпсіздіктің негізгі қағидалары мен ережелерін өрескел бұзу» деп атады.

Оның айтуынша, «Росатом» болған оқиғаны «қатаң айыптайды» және қақтығыс тараптарын Бушер АЭС маңындағы жағдайды ушықтырмау үшін «барлық мүмкін шараларды қабылдауға» шақырады.

Бушер — Иранда салынған алғашқы атом электр станциясы. Оның құрылысы 1975 жылы басталып, кейін тоқтатылғаннан соң 1995 жылы «Росатомның» қатысуымен қайта жанданды. АЭС-тің бірінші энергоблогы Иранға 2013 жылы тапсырылды. Ал 2016 жылы екінші энергоблоктың құрылысы басталды.

Айта кетейік, Қазақстандағы АЭС құрылысын салуға «Росатом» компаниясы лайық деп танылды. Былтыр Алматы облысы Жамбыл ауданы Үлкен ауылы маңында Қазақстанда АЭС салу жобасы бойынша жұмыстардың басталуына арналған салтанатты іс-шара өтті. АЭС құрылысының ресми ашылуында «Росатом» мемлекеттік корпорациясының бас директоры Алексей Лихачёв болды. 

Оқи отырыңыз:

• «Росатом жобаларын көрсетті»: Балқаш жағасында алғашқы АЭС-тің құрылысы басталады
• Неліктен Қазақстандағы алғашқы АЭС-ті Ресей салады?
• Қазақстанда АЭС салатын «Росатом» қандай технология қолданады?