«Имам шақырып, құрбан шалдық»: Қорғаныс министрлігі жоғалған тікұшақты қалай іздегендерін айтты

Алматы облысының Жамбыл ауданында орналасқан Тарғап ауылының маңында әскери тікұшақ радардан жоғалып кетті. 13 күннен бері іздестіріліп жатқан тікұшақ жайлы Қарулы күштері Әуе қорғанысы күштерінің бас қолбасшысы Асқар Ізбасов сұхбат беріп, елдің сұрауымен имамдарды шақырып, құрбан шалғандарын айтты.Көп ұзамай Ізбасовтың сұхбаты аяқ астынан Youtube-арнадан өшірілді, деп хабарлайды Orda.kz.

Қазақстан Республикасы Қарулы күштері Әуе қорғанысы күштерінің бас қолбасшысы Асқар Ізбасов үш экипаж мүшесімен бірге жоғалған EC-145 әскери тікұшағын іздеу кезінде тек техникалық құралдармен ғана емес, діни рәсім де жұмыс жүргізілгенін айтты.

Ізбасовтың айтуынша, іздестіру жұмыстарына имамдар шақырылып, арнайы құрбандық шалу амалдары жасалған. Алайда ол «тылсым күштердің де септігі тимегенін» айтты. 

Десе де, бейнежазбадан алынған үзінділер әлеуметтік желілерде тарап кетті. Желі қолданушылары бұл мәлімдемелерді қызу талқылап жатыр.

Жоғалған тікұшақ Алматы облысындағы Сорбұлақ көлі маңында радардан жоғалып  кеткен. Іздестіру жұмыстары жалғасып жатыр. Алайда әзірге еш нәтиже жоқ.