Еуроодақ Трамп пен Путиннің кездесуінен кейін Ресейге санкциялық қысымды жалғастыратынын мәлімдеді

Еуропалық кеңестің сайтында бірлескен мәлімдеме жарияланды, онда еуропалық саясаткерлер Украинаны қолдауды жалғастыруға және Ресейге қысымды күшейтуге дайын екендерін растады, деп хабарлайды Orda.kz.

«Әзірге келісім жоқ», - деген АҚШ президенті Дональд Трамптың сөзі баршаға мәлім. Олардың айтуынша, келесі қадам Зеленскийдің қатысуымен өтетін келіссөз болуы тиіс.

«Біз сондай-ақ Еуропаның қолдауымен үшжақты саммит ұйымдастыру үшін президент Трамппен және президент Зеленскиймен жұмыс істеуге дайынбыз» деп жазылған мәлімдемеде. 

Еуропалық көшбасшылар Украинаның егемендігі мен аумақтық тұтастығын тиімді қорғау үшін «темірбетон кепілдіктер» болуы тиістігін атап өтті.

«Біз президент Трамптың АҚШ-тың осындай кепілдіктер беруге дайын екені туралы мәлімдемесін құптаймыз», - деп жариялады олар.  

Сонымен қатар олар Украинаның қарулы күштеріне және оның үшінші елдермен ынтымақтастығына ешқандай шектеу қойылмауы тиіс екенін еске салды. Ресейдің Украинаның ЕО және НАТО жолына вето қоюға құқығы жоқ екенін де ескертіп өтті.

«Өз аумағы бойынша шешімді Украинаның өзі қабылдайды. Халықаралық шекаралар қара күшпен өзгермеуі тиіс», - деп мәлімдеді еуропалық саясаткерлер. 

Мәскеуге қарсы санкцияларға ерекше назар аударылған.

«Біз әділ әрі берік бейбітшілік орнағанға дейін Ресейдің әскери экономикасына қысым көрсету үшін санкциялар мен экономикалық шараларды кеңейтуге ниеттіміз. Біз Украина мен Еуропаны қорғайтын бейбітшілік үшін жұмыс істеп жатырыз, сондықтан Украина біздің мызғымас ынтымақтастығымызға сенім арта алады» деп нақты жазылған қорытынды бөлімде. 

Мәлімдемеге Франция президенті Эммануэль Макрон, Италия премьер-министрі Джорджи Мелони, Германия канцлері Фридрих Мерц, Ұлыбритания премьер-министрі Киэр Стармер, Финляндия президенті Александр Стубб, Польша премьер-министрі Дональд Туск, Португалия президенті Антониу Кошта және Еурокомиссия басшысы Урсула фон дер Ляйен қол қойды.

Бұған дейін Трамп Путинмен Аляскадағы келіссөздерді қорытындылап, кездесу күнін «өте табысты және тамаша» деп атады.

Зеленский Трамппен 18 тамызда  Вашингтонда кездесетінін және сәтті аяқталған жағдайда Ресей президентімен келіссөздер ұйымдастыратынын хабарлады.

Тоқаев  Дональд Трамп пен Владимир Путиннің Анкориджтегі кездесуін құптайтынын және оны Украинаға қатысты ең жоғары деңгейдегі келіссөздер үдерісінің басталуы ретінде бағалайтынын атап өтті.