Енді мұғалімдерге тіл тигізгендер айыппұл арқалайды немесе қамалады

Енді мұғалімдерге тіл тигізіп, оны балағаттағандарға 157 мың теңге айыппұл салынады, деп хабарлайды Orda.kz. 

Бұл туралы оқу-ағарту министрлігінің заң басқармасының директоры Гүлден Ақытаева айтты. Ол мұғалімдерге заңсыз талап қоюға болмайтынын мәлімдеді. 

Гүлден Ақытаеваның айтуынша, мұғалімдерді қызметтік міндетіне қатысы жоқ жұмыстарға тартуға болмайды. Сонымен қатар, заңда қарастырылмаған есеп беруге және ақпарат сұратуға мәжбүрлеуге рұқсат етілмейді. Мұғалімдерді негізсіз және заңсыз тексеруге, тауар немесе қызмет сатып алуға мәжбүрлеуге болмайды. 

Мұғалімді қорлағаны, әдепсіз әрекет жасағаны, әлеуметтік желіде тіл тигізгені үшін 157 280 теңге айыппұл немесе 5 тәулікке дейін әкімшілік қамауға алу жазасы қарастырылды. 

Айта кетейік, 15 тамыз күні мемлекет басшысы «Педагог мәртебесі туралы» заңға ұстаз құқығын қорғау жөнінде өзгерістер енгізуді ұсынды.