«Дулығасында соғыста қаза тапқан спортшылардың портреті бейнеленген»: Украиналық скелетоншы Олимпиададан шеттетілді

Украиналық скелетоншы Владислав Гераскевич Италияда өтіп жатқан Олимпиадада алғашқы жарыс алдында шеттетілді. Бұған оның қаза тапқан спортшылардың портреті бейнеленген «естелік дулығамен» өнер көрсеткісі келгені себеп болған, деп хабарлайды Orda.kz Meduza басылымына сілтеп.

Гераскевич Олимпиадаға Украина құрамасының көшбасшысы ретінде келген. Ол соғыс кезінде қаза тапқан украиналық спортшылардың портреті бейнеленген дулығамен жарысқа қатыспақшы болған. Спортшы бұл дулығамен ресми жаттығуға шыққан, алайда кейін Халықаралық Олимпиада комитеті оған жарыс кезінде «естелік дулығасын»  пайдалануға болмайтынын ескерткен. Тіпті жарысқа қатыспай қалуы мүмкін екені де айтылған. Бірақ спортшы ойынан айнымаған. Бұл туралы Гераскевич 10 ақпанда әлеуметтік желідегі парақшасында жазды. Спортшыны Украина президенті Владимир Зеленский қолдап, дулығада Ресей әрекеті салдарынан қаза тапқан украиналық спортшылардың портреттері бейнеленгенін айтты.

12 ақпанда ХОК пен IBSF дулығаны тағуға киюге рұқсат бермейтінін мәлімдеді. Осыған байланысты ол жарысқа қатысушылар тізімінен шығарылды.

ХОК бұл жағдайға қатысты мәлімдеме жасады. Спортшы ХОК өкілдерімен, президент Кирсти Ковентримен жеке кездесулерге қарамастан «ешбір ымыраға келмеген» көрінеді.

ХОК шешімінен кейін спортшы «Украина мүддесін және қаза тапқан спортшылардың естелігін қорғағаны үшін абырой жолында құн өтегенін» мәлімдеді. 

Оқи отырыңыз:

• Зеленский әуе қорғанысы жүйесін түбегейлі өзгертуге кірісті
• АҚШ Украинадағы соғысты жазға дейін аяқтауды келіспек — Зеленский