Денсаулығы нашарлаған Думан Мұхаммедкәрім түрмеде қысым көріп жатыр

Журналист Думан Мұхаммедкәрімнің түрмеде денсаулығы қатты нашарлады. Тіпті отырудың өзі қиындаған. Ол соған қарамастан түрме қызметкерлері жұмысқа салып, көнбіс қылу үшін қысым көрсетіп жатқанын айтты, деп хабарлайды Orda.kz.

Оның қазіргі жағдайы туралы құқық қорғаушы Бақытжан Төреғожина Facebook парақшасында мәлім етті.

Мәліметке қарасақ, 2025 жылғы 19 сәуірден бері Думан тәртіптік изоляторда қамауда отыр. Бұған оның түрме формасын киюден бас тартқаны себеп болған. Бұл — жазасын өтеп  жатқандарға қолданылатын ең қатаң тәртіптік шаралардың бірі.

«Адвокатпен кездескенде Думан белінің қатты ауырғанын, ұзақ уақыт отыруға да, тік тұруға да мүмкіндігі жоғын айтты. Медициналық қызметкер оған төсекте жатып ем алу қажет екенін айтқан. Түрме әкімшілігі 30 маусымда Думанды ауруханаға тексеруге жіберуді жоспарлап отыр. Себебі ауырсынуды басатын дәрілер көмектеспей қалған. Оның денсаулығы едәуір нашарлап кеткен» деп жазды Бақытжан Төреғожина.

Думан Мұхаммедкәрім сот үкімімен белгіленген 2 жыл 8 айдың бір бөлігін өтеп үлгерді. Әкімшілік оны жазаның жеңілдетілген режиміне көшіру туралы хабарлағанымен, белсенді бұл ұсыныстан бас тартқан.

Бұған дейін Думанға қысым көрсеткен және қорлаған тұтқындар басқа колонияларға ауыстырылған. Бірақ мекеме әкімшілігі тарапынан қысым әлі де жалғасып жатқаны айтылды. Қызметкерлер оны түрме формасын киіп, дәретханаларды тазалауға мәжбүрлеп, «тәртіпке көндіруге» тырысып жатыр. Думан бұл талаптарға келіспей, түрлі мемлекеттік органдарға шағым, өтініштер жолдаған.

Изолятор — ауа айналымы нашар, өте тар және бір адамға ғана арналған камера. Белсендінің айтуынша, ол жерде таза ауа жетіспейді, тыныс алу қиын.

Еске сала кетейік, Марат Жыланбаевтың адвокаты Мейіржан Досқараев марафоншының сегізінші рет аштық жариялауына не себеп болғанын айтып берді.