Даниал Ахметовтің күйеу баласы ҚТЖ басшысы болып тағайындалды

Шығыс Қазақстан облысының бұрынғы әкімі Даниал Ахметовтің күйеу баласы Ерлан Қойшыбаев «Қазақстан темір жолы» ұлттық компаниясы басқармасының төрағасы міндетін уақытша атқарушы болып тағайындалды, деп хабарлайды Orda.kz.

Компания мәліметінше, тағайындау ішкі нормативтік құжаттарға сәйкес жүзеге асқан.

«Ішкі нормативтік актілерге сәйкес, “Қазақстан темір жолы” ұлттық компаниясы” АҚ басқарма төрағасының логистика жөніндегі орынбасары Ерлан Қойшыбаев ҚТЖ басшысының міндетін уақытша атқарып отыр», деп хабарлады ұлттық компанияның баспасөз қызметі.

Айта кетсек, Ерлан Қойшыбаев — бұрынғы ШҚО әкімі Даниал Ахметовтің күйеу баласы, яғни Аделия Ахметованың күйеуі.

Бұған дейін Қойшыбаевтың аты ҚТЖ төңірегіндегі жанжалдарда аталған. 2022 жылы компания қызметкерлері президентке хат жолдап, басшылықты жемқорлық, қаржы жымқыру және заңсыз ақша шығару істеріне қатысы бар деп айыптаған болатын. Сол хатта аты аталғандардың қатарында Ерлан Қойшыбаев та болған.

Хат авторларының айтуынша, Ахметовтің туысы мемлекетке 6 миллиард теңгеден астам залал келтірген.