Батыс Қазақстанға жақын өңірде жойқын шабуыл: Украина дрондары соққы жасады

Бүгін таңертең Украина дрондары Батыс Қазақстан облысымен шектесетін Ресейдің Саратов облысына шабуыл жасады, деп хабарлайды Orda.kz.

Idel.Реалии-дің мәліметінше, облыс губернаторы Роман Бусаргин бұл шабуылды Украинадағы соғыс басталғалы бері ең күшті соққы деп атады. Ресейдің Қорғаныс министрлігі Саратов облысында 54 украиндық дронның атып түсірілгенін мәлімдеді.

Ресейлік БАҚ-тың хабарлауынша, шабуыл Саратов пен Энгельс қалаларына бағытталған. Негізгі нысан – «Энгельс-2» стратегиялық бомбалаушы аэродромы.

«Оқ-дәрі қоймасына соққы жасалғандықтан, жарылыс болды. Жақын маңдағы үйлердің терезелері шағылып, шатырлар мен қоршаулар зақымданды» деп жазады Idel.Реалии.

Ауыл тұрғындарының көбі эвакуацияланды, ал Энгельсте төтенше жағдай режимі енгізілді.