Басты басымдық — бейбітшілік: Тоқаев пен Зеленский телефон арқылы сөйлесті

Екі ел президентінің әңгімелесі Украина тарапының бастамасымен өтті, деп хабарлайды Orda.kz Ақорда мәліметіне сүйеніп.       

Қасым-Жомарт Тоқаев пен Владимир Зеленский 10 тамыз күні түстен кейін сөйлесті.

«Қасым-Жомарт Тоқаев қазақ халқы украин халқына, оның тарихына, мәдениетіне, тіліне шынайы құрметпен қарайтынын атап өтті. Ол халықаралық құқық қағидаттары негізінде Украинада берік бейбітшілік орнауына Қазақстанның сөзсіз мүдделі екенін растады» деп жазылған Ақорда хабарламасында. 

Тоқаев Қазақстан бастапқыда қақтығысты бейбіт жолмен шешуді, бірақ БҰҰ Жарғысын, егеменді мемлекеттер шекараларының қол сұғылмаушылығын және олардың аумақтық тұтастығын сақтай отырып, жақтағанын еске салды.

«Қасым-Жомарт Тоқаевтың пікірінше, қазіргі күрделі жағдайда Украина мемлекеттілігінің сақталуы мен қорғалуын қамтамасыз ете отырып, қақтығысты байыпты және ұтымды шешу маңызды. Ол барлық тараптар ежелгі даналыққа сәйкес әрекет етуі тиіс деп санайды» деп жазады Ақорда. 

Қазақстан Президенті бейбітшілік жолында жиі кедергі болатын аумақтық проблемалардың күрделілігін түсінетінін жеткізді.

«Қазір басты басымдық — Украина қауіпсіздігінің мызғымас халықаралық кепілдіктері негізінде Украина мемлекеттілігін сақтау» деп келтіреді Ақорда Тоқаевтың сөзін. 

15 тамызда Аляскада Дональд Трамп пен Владимир Путиннің кездесуі жоспарланған, онда Украина тақырыбы да талқыланады.  Дегенмен Ақ үй Украина президенті Владимир Зеленскийді Аляскаға шақыру мүмкіндігін қарастыруда.

Украина мен ЕО елдері  Ресей тарапынан бұған дейін ұсынылған Донбасстан бас тарту арқылы соғысты тоқтату шартын толықтай қабылдамады. Олар соғысты тоқтату жөнінде өз жоспарларын ұсынды.

Иран Ислам Республикасының Жоғарғы көшбасшысының кеңесшісі Али Акбар Велаяти Кавказ аймағында АҚШ-тың дәліз құруына жол бермейтінін, бұл жағдайда Ресейдің Тегеранмен одақтас болу-болмауы маңызды емес екенін мәлімдеді.